هَزَّتنِي ريح لَمْحَبَّة
وْ تَهْت فْ سْمَاكْ
يا جْناحِي ما مَنْ سَبَّة
نْفَدفَد وْ نَرجَع لِيكْ.
جَابَتنِي فْ صُلْب النَّشْبَة
جُرح مْعَلَّق فْ اسْلَاكْ
كِيف نْجُرُّو مَن شَطبَة
هَاذْ الجُرح مَنَّكْ لِيكْ.
شْحَالْ فْ عَينِيكْ مَن كَذبَة
وَ الزِّينْ كَذبَك وَاتَاكْ
يَاكْ سِيفَكْ علَى الرَّقبَة
ها عمري وْ كْتَبتُو لِيكْ.
كْتَبتِيه برِيشَة كصبَة
هو عبدَك وْ مُولاَكْ
صبري يا بنت الكلبة
وَلاَّ يَبغِي فِيكْ شْرِيكْ.
تكَتبِيه فْ خَطوَة عَطبَة
وْ يْكَتبَكْ مَ لَّهْلَاكْ
وْ تهَزِّيهْ بْكصبَة غَضبَة
يا حَمْقَا يَلْعَن وَالْدِيكْ.
تهَجرِيه بَاشْ يَترَبَّى
وْ تكُولِي: هَاكْ سْوَاكْ
يَتمَنَّى فِيكْ الغَلْبَة
وْ يْطَيَّح لَبَّاكْ سَنِّيكْ.
يا قْصِيدَة يا بَنت الكَلْبَة
يا هْبِيلَة شْكُون بْلَاكْ ؟
يا قْصِيدَة وْبدِيتِي لَعبَة
تْلَعبِي بِيَّ، نَلْعَبْ بِيكْ.