✍🏼 بقلم: [ذ.هشام الدكاني]
واش بصح ولا غير كاميرا كاشي؟ هادشي اللي كيسولو عليه المغاربة بعدما شافو (المستشار التقني) «للجامعة الملكية المغربية للكيك بوكسينغ» ، «السيد لحسن الهلالي» ، هرب وخلى الندوة الصحفية لي كان حاضر فيها البطل العالمي «طارق خبابز!» ، غير حيث دخل البطل السابق مصطفى لخصم..!
«لحسن الهلالي» في موقف لا يُحسد عليه!
السيد عرف مزيان باللي «لخصم» غادي يكون حاضر ، وهادشي علن عليه الصحفي مسبقا ، يعني ما كاين حتى عذر يقدر يبرر هاد الهروب المفاجئ..
ولكن ، كيفما كيقولو «اللي فكرشو العجينة.. كيخاف من الطياب».
– واش السيد خاف من المواجهة؟
– واش عندو شي حساب قديم مع لخصم؟
– ولا غير حشمان وماقدرش يهضر قدامو؟
لمغاربة تايتسائلو اليوم:
– واش هادي جامعة أو عائلة؟
كولشي كايعرف بأن «الجامعة الملكية للكيك بوكسينغ» ، تحولت لشي حاجة كتشبه (الملك الخاص!) ، بعدما بقات مسيرة من طرف نفس العائلة لأكثر من (35 عام) ، إييه 35 عام ينطح عام!!!
بحال شي مسلسل مكسيكي ما كيساليش(Santa Barbara) مثلا…
من أيام الرئيس السابق (الله يرحمو) حتى اليوم ، والنائب الأول ديالو باقي ماسك خيوط اللعبة ، رغم أن هاد السيد ما عندو حتى علاقة بالرياضة ، لا من قريب لا من بعيد.. اللهم إلا إذا كان كيمارس (رياضة البقاء في المنصب) وهادي هضرة أخرى…
البطل العالمي «طارق خبابز» ، لي كان الضيف الرئيسي ، ما فهم والو من هاد السلوك؟!!!
كيفاش يكون شي حد (مستشار تقني) ، ولكن ما عندو القدرة يواجه الناس لي عندهم تاريخ في رياضة «الكيك بوكسينغ»؟
– واش الجامعة ما بقاش فيها غير «التسيير العائلي» و «زيد خلّص»؟
– فين أودي غاديين بهاد الرياضة؟
المهم ، بعدما شفنا هاد «الهروب الكبير» ، خاص الجامعة تفسّر لينا:
– واش هاد التصرف يدخل في «تكتيك رياضي» جديد؟
– ولا مجرد خوف من المواجهة الحقيقية؟
لأنه بصراحة ، شي مسؤولين خاصهم يديرو «الوزن الرسمي» قبل ما يدخلوا للحلبة ديال الكلام والمواقف!
الحاصول! ، كيبان باللي الجامعة خاصها تعيد حساباتها ، حيت الرياضة خاصها ناس كيخدموها ، ماشي ناس كيستغلوها…
يتبع…