عود الدفلى
وخ تمرمدو ف لعسل
ما عمرو يحلى
و النملة وخ تجنّح
ما يمكن ترجع نحلة 🐝
ولا الفروج إبيّض
و لا يوم تولد البغلة
غير قطع حسك
و لمْ طلامسك
ما تعاود سرك لمن والى
راك تعود ضحكة
ف عيون الگوّالة
وخ تضل تهضر
وخ إهرّط لحمار ف لبحر
ضربهوم ب ” مشّي”
فوتهوم و مشي
و عطيهوم ” النخالة “
وٖلى خوا ليك الجيب
إبان فيك العيب
إقبضو ف قشابتك
و يلبسوك دربالة
تولّي عندهوم رخيص
و يتلونو عليك ك بوبريص
و يطيحو سومتك
ف سوق الدلالة
و تولّي حالتك
ما بحالها حالة….