البارح دازت الرعدة
واليوم لبرق عاد ضرب
و غدّا الشتا عاد تصب
ما يثمر حب
ما يكبر قصب
حتى يسلم ليهودي ـ ـ
آوعدي .. آوعدي..
آش كّالت لرصاد؟؟؟
بين الحرث و لحصاد
قرن و زمّارة
وهاذ الساعة
عكّاربها لسّاعة
لسعتها تخلي لمارة
آوعدي .. آوعدي ..
تسنى يا ولدي …..
حتى تطيب الغلة
و العنقود يتدلّى
آوعدي .. آوعدي ..
تكّلبات لمنازل أولدي
و الوقت بدا يتفلّى
ها كرموس النصارى
ها الباكور الهندي
واللواية لوات
ما بقات تتعلّى
ما تخضر بقولة
ما تكبر سبولة
حتى تحفا لمناجل و تصدّي
وانتوما هداو .. و رساو
وانتوما زكّاو .. و تسنّاو
حتى يرطاب الضباب
و يصب السمن البلدي
واااا انتوما دويو..
بخّووووو.. وكويو..
انا بعدا كويتها في يدّي