✍🏼بقلم: [ذ.هشام الدكاني]
ملي دخل سي أخنوش للحكومة ، وعدنا بغد أفضل ، بشعار «تستاهل أحسن!». المغاربة آمنوا ولو جزء صغير من الأحلام غادي يتحقق:
(تعليم يرفع ولادنا ، صحة تحمي شعبنا ، وأسعار تخلي المواطن يعيش بكرامة وزيد أوزيد…) ، لكن دابا كولشي وضح وضوح الشمس فنهار جميل:
هاد الوعود كانت كلام الليل اللي كيمحيه النهار ، والشعب غارق اليوم وسط أزمات خانقة…) منها:
1. التعليم:
مستقبل مظلم للأجيال.. أسي أخنوش ، شحال من ولد وبنت اليوم حالم بشي مستقبل أفضل ، ولكن التعليم اللي وعدتونا بإصلاحو مازال فالحضييييض!
الأقسام مكتظة ، المناهج متخلفة ، والمدارس العمومية بحالها بحال الزمان ، بلا تجهيزات ولا ٱهتمام.
اللي عندو باش يقري ولادو فالخواص راه مرتاح ، ولكن اللي ما عندوش؟
واش المستقبل ديال ولاد الفقراء هو الشارع؟!
2. الصحة:
المريض يتمنا يموت قبل ما يتعذب ، المستشفيات بحالها بحال الوقت ، صفوف طويلة ، أدوية غالية ، وأطباء كيخدمو وسط ظروف كارثية!!
المواطن اللي خاصو يتعالج ما كيلقاش باش وكيفاش ، وديك اللحظة اللي المريض كيدخل فيها لمستشفى عمومي ، بحال اللي كيتمنى يدير معجزة!!!.
3. البطالة:
الشباب كيدير الحريك بأرواحو.. فين هو داك المليون منصب شغل؟
الواقع هو أن الشباب اليوم كيتسناو فرصة بلا أمل ، واللي ما قدرش يلقاها ، راه البحر كيبقى هو الحل الوحيد..
شحال من شاب مات وسط الأمواج باش يهرب من واقع مغرب ما عطاهش حتى أمل بسيط ، وهادشي بسباب وعودكم الكاذبة أسي عزيز..
4. الغلاء:
الحياة تحولت لكابوس ، كل شي غالي..
السكن ولا مستحيل للشباب ، المعيشة اليومية تصورخات ، وحتى الحاجات الأساسية بحال الدواء والأكل ولات أحلام! المغاربة كيديرو معجزات باش يكملو الشهر ، والحكومة ما زال كتفرج!!.
5. أزمة الحوار:
حكومة الصمت.. الشعب ما كيبغيش المعجزات ، ولكن بغا يسمع كلمة حق ، ما كاين حتى حوار ، حتى تواصل ، الحكومة ولاّت كتشوف الشعب كأنه «عدد» ، ماشي ناس عندهم معاناة حقيقية!!!.
فين هي الوعود؟
أسي أخنوش ، المغاربة عطاوكم ثقة ، ماشي باش تكملو مشاريعكم الخاصة ، ولكن باش تخدموهم.. ولكن ، نفس السيناريو اللي عاشوه مع الحكومات اللي سبقاتكم ، بل كثر وكثر…!
واحد فالقهوة قالها زوينة:
«حنا ما باغينش نعيشو بحال أوروبا اللي وعدونا بيها ، غير نعيشو بكرامة فبلادنا..!»
✓رسالة الشعب:
المغاربة ما بقاش عندهم الصبر.. السياسة راه ماشي مسرحية ، وماشي بلاصة للتجارب..
المغاربة عاقوا بأنكم كتشوفو مصالحكم أكثر من مصالحهم ، وما بقاوش باغين شعارات بلا معنى..
سقط القناع..
والشعب اليوم واضح معاكم:
بغينا أفعال ، ماشي أقوال..
بغينا حكومة كتخدم ، ماشي حكومة كتردم..
والوقت كيدوز ، يا إما تصلحو ، يا إما التاريخ والشعب غادي يكونو أقسى من أي صندوق انتخابي جا.
المغاربة عياو.. ولكنهم عمرهم ما يستسلموا.