ذبان يا بلادي ذبان ..
**********************
أنا ما حبيت قصايد
وما تمنين نكون شاعر
غير وعد الزمان
ولحزان
وشلا حماق
فاق ف راسي وعاق
وسال ع لوراق
…
آه يا راسي كن عقتي مزيان
كون تبعتي طريق لولايم
ولبهايم
وتكجكجتي ذبان
على زبالة لوطان
وربيتي بزة وجناح
وقلتي : يانافخ لبزاز
انفخ وزيد ف شحمة لمعلوف
منفوخ ومكروش وكاينة ظروف
وراه كاينة ظروف
لقصايد ماتبرد الجوف
لبلاد خصها قرد بكرونو
سايك الرونو
وحافظ مسنونو
وتابعو تابع
ناصب ورافع
نعجة وخروف ..
وراه كاينة ظروف
كاينة ظروف
كاينة
ظروووووووووووووووووووووف
زجل : محمد نور الدين بن خديجة
20يونيو من سنة 2013