بوناني بابا نويل
مشى عام
وجا عام
وصبات شتا
وطاح ثلج
ونشفوا ويدان ..
وماتوا ناس
وكبروا حيوان ..
وطاحت راية
وتعلاوا عروش
وتفركعات كروش
وآمن شيطان ..
سدوا السراجم
وخبيوا لكلام
وارميوا قفولة ع لبيبان ..
لا دق دق سمعناها
ولاعمي زعكون ..
ولا قال انا
ولا قلنا شكون ..
وانعس ياولدي
را لكلام
هذ العام
بالسكات مشطون ..
…
…
دارت ليام ..
داخت ف ريوسنا
وغطسات ف الدمع
لحلام ..
هيه يا عاود يجري
والسوايع م وراه
والبارود والريح
والشهدا وفلسطين
وعروسة بلا عريس
وجمعة بلا خميس
وتناش د الليل
ضاعت ف الطرقان ..
وف ضلوع العريان ..
وشطحات وغنات :
بوناني .. بوناني ..
بوناني .. بوناني …
بوناني ف الراس الخاوي
وف وجه السكران ..
بوناني ف لفقايس
بوناني ف لمحاين ..
بوناني تجري
ف ثوب امزق
و ف رجل الحفيان ..
بوناني للحيوط
بوناني للدروبة
بوناني للبكا
والضحكة المزروبة ..
بوناني موسيو monsieur
بوناني ما دام madame
بوناني ليفيو les vieux
بوناني ليكامان les gamins
بوناني خلط أتاي بالشراب
البونية بالبوسة
وبين البسمة لى الناب ..
وزور الدمعة وردية
تفتن ع لكتاب ..
…
…ياه وانا على عاودي
طاير ف لحلام
تعثرنا ضبابة
وسحابة م لكلام ..
مديت ايدي لقلبي
هجم الخوف
وطاح اللجام ..
صبات شتا م لحروف
ترفعات لسما كفوف ..:oh la la mon dieu
بابا نويا اللي يبغينا
يضحك يرضي علينا
بابا نويا آش يهدينا
ف ليل طويل بالجوع
ف صبر مدبور ومضبوع ..
….
…
..
بابا نويل
بوناني بوناني
ينعس اللاصق
ويكمع الفاسق
ويحلم ياما
ف بلاد الحلم الممنوع ..
زجل : محمد نور الدين بن خديجة
من أزجال أواخر التسعينات