بلادي ياضو البهى
يانجمة عالية فالسما
شالي بحيكك
هزيه نشوف بهاك
يا شهدة الساكنة فالقلب
محلي مرار ليام
الراگدة فعين مهدبة كحلة ظلام
جيت من بعيد
نسابق الريح
نغنم ضمة من تراب
لقيتك معرشة رسام
بلا كلام.. واقفة تعاندي ليام
شكون كدر صفاك
خطف بهاك
خلا خيمتك مردومة
عريانة تلاقي صهد البرد
وأنا لي جيت…واناليجيت.. نسبق الخطوة
فالقلب طاوي شلا غصات
فالخاطر تحفرات
نسبق الليل فطلوعو
معول نشوف نجومو ضحكة بعطفتك دفات
طالة فرحة من عينيك
حايزها حيك ونقاب
كيف الحلمة كنتي دازت وبقات فالعقل داكة لوتاد
كيف الغصة فالخاطر حفرات كلام
مغلوب
معطوب
تخالفت عليه الدقات
الخاطر منو عثر
فيك نسال حقي شمة فهوى
على جناح الريح
نصرفو تنهيدات على وجاع الكيات
نصرفوا عيطات
تهز الجبال
تبكي الغمام
بدموع النخوة
تدفن القهرة
تكسر جهد الحقرة
تغسل لقلوب العاصية
فيك نسال حقي شوفة فضو الگمرة
نمشي عليه خطوات
نروي فيه حكايتي الگاعات
فيك نسال حقي شبر اوحفنة تراب
فيهم ندفن العناد
نولد لولاد
يلعبوا لولاد
يكونوا ليا سما… قبر …وبلاد
و نسال حقي
من جهدي لقلال
فيك نسال… ونسال… ونسال
فيك نهيت على سربة الحمام لمغطية لغمام
عل الطير الحر يدي لخبار
لذيك الخيل الواقفة فمحرك بارودها دخان
صوت مكاحلها صمك
رقبت عليك من صهد ناري دخانها ريح
ودواخلي نارها زرنيخ
قلبي فيك جمر حامي
يراري بالصبر
يداري جرح اللامة
ويقول يمكن يقشع ضو جديد
يبدل لحوال
يفك لخبال
والوگادة يحنو… من عطوب الحال