تغيرات الاوقات
والتنهيده فالجوف تخنقات
قلنا نبدلو ساعه بساعه
نفاجيوها عالذات
نجلس لصينيتي
بكيسان مشحره
وبراد يلمع قمره
ينور ليل النجمات..
لوز معسل
و تمر مسكر
يتدلى لوبان من
صدر عرايس النخلات..
درناها حديث ومغزل
رديت المقراج عالمجمر
زندتو بفم رابوز
يتلذذ بضشاش الجمر
يحرق اليابس والاخضر
هاك وأرى فالكلام
مقراجي ينين
وسبولتو تبكي
بحمل أيام السنين
قلت:
مالك يامقراجي تنين
واش الجلسة مافاجات
ضيم قلبك الحزين!؟
واش العافيه زادت
لعوافيك حرقة وضيم؟
قال:
ماحرقني
غي الما للي فجوفي
سمعتو يبكي
ومن قلة زهرو يشكي
بلسان الحكمه يحكي
أنا للي من السما هويت
وبخيري عالأرض تخويت
والشجر للي سقيتو
بعوادو تكويت
لاأنا طبت ولا تشويت
ولا أنا من العوافي تهنيت
جرح الدنيا مايبراش
وللي شرب من كاسها مايرواش
الحاصول هذا حديث ومغزل
وبراد من قلب الصواني
يعيط عللي بغاني..
مرحبا بللي
دق علينا وقبل
على حصير الفراش
نسانا فللي نسانا
وللي فينا ماسقساش..
نكبوه تشليله من الكاس
نديرو من محبتو بلاش
ياك تعلمنا نفرقو
بين للي يسوى وللي مايسواش
والحديث معنى وقياس…
فاطمة رحموني