- داخلت عليك بالله
إلى ماعفيني من السلام
راه كثرة الهضرة
تطيح الجبال
وتخنز حلاوة اللسان
هاك وآرى
ودي وجيب فالكلام
يرخي للعيب الرسام
يطحنو طحين الرعده
لصابة الغمام
ينغدو ويغيزو
بلا عقل ولا تخمام
واش من قيمة للسان
يرححي فالكلام؟
يقطع ويفصل بلا عبار
خاطيني من القال والقيل
ماأنا الباتول العذرا
ولا من أمهات المسلمين
ماأنا بكرامة أم المؤمنين
ولا من للي بالجنه مبشرين
ولاأنا منزله برسالة
بوحي سيدنا جبريل
أنا وليه وحصيره
الزمان علي مكفيه
مثقله بحمال الرحيل
لاهو من جوهر وحرير
ولا رصاص بحجر ثقيل
نمشيها مرادفا
بخطاوي مخالفا
بين الخطوه والخطوه
عمر من ضرع السحابه
رضع النخوه رغوه..
قول للي فيا فيا
وللي مافيا واليه ليا
نزوقو درباله ونرميه عليا
باش تبقى الخواطر
صافيا نقيه
غي أما
الداوي مايغريك
للي قال عليا
يقولو عليك..
خليني نساعفها
أيام الدنيا تدوز قليلة
نمشي جنب الحيط
ماشي ضعف ولاقلة حيله
خليها السوايع تدوز
راه الضو يتبع الضليله
والنيه ماترافق الحيله
فاطمة /ر