1- الراكب لابد يطيح ..
—————————
دخلت عليك بالمحبة
وقلبك الا كان سميح ..
آ جيني بلا ما تتخبا
وتكلم معايا صريح ..
خليتي نفسي معذبة
وعقلي عاصف بيه الريح ..
راك درتيها غير سبة
واجهتني بكلام قبيح ..
دخلت عليك بالمحبة
وقلبك الا كان سميح ..
يحاسبك ربي ف كل كذبة
وحماقك ماعندو تلقيح ..
غدرتين ونكرتي الصحبة
كلتي فيا لي ماهو صحيح ..
درتي من الحبة قبة
وعيبي بين الناس يسيح ..
خايف تجيك الحسبة
والزمان حر من الشيح ..
عندك تغرك الركبة
والراكب لابد يطيح ..
2- الحامولي ..
———————-
كيفاش نخرج من لوسخ
وصابون الدنيا عياني ..
راه بان على وجهي لمسخ
والناس زادو ف محاني ..
عييت ما نلبس ونفسخ
والزمان خان بي وعراني ..
قلبي بالصبر تنفخ
وشحال من حبيب نساني ..
كالوا واش عقلي مكلخ
وانا الأناقة ف لساني ..
طبعي ف عماقي مرسخ
حالتي ماهي بلعاني ..
راني جبح قديم مسخسخ
وفي شلا قصايد وشلا معاني ..
3- خلوني خلوني ..
—————————
خلوني خلوني نعيش
تبقى ذاتي سالمة
تمنيت نموت
موت الله
لاتجرحوني بحديد
لاتخنقوني بيدين
لاتقيدوني بسلاسل
حيدوني من غبار الخيل
وحطوني كيف السلاح البارد .
4- طار الطير لسماه
————————-
طار الطير للسما
ف الهوا تكسروا جناحو
مسكين يترجا الرحمة
واليوم القدر لاحو
مابين زيتونة وكرمة
طاح وتجرح ف طياحو
نهارو ولى ظلمة
ما رفرف ما غرد ف صياحو
بالقدرة صادف الصدمة
مادمع ماشكى بجراحو
منشور يترجى الرحمة
والطيور كلهم راحو
الشمس وهباتو البسمة
والظلم ماهو ف صلاحو .
5- العز ..
———-
من زين العود
الا كان جدع
يتربى ف العز ولعناية
مايهز ثقل مايتبردع
يبرى الجرح
الهرس ولفدع
ماتبرى لقلوب
المطبوعة بالغش ولخدع .
*** عبد الرحمان الحامولي شاعر زجال من مدينة الصويرة ..شاعر خرج من رحم المعاناة والتفاعل مع ثقافة الشعب .. شاعر عصامي .. اشتغل بالحلاقة منذ نعومة اظافره ..تحمل مسؤولية الأسرة صغيرا بعد وفاة والده .. له أزجال تغنيها مجموعات غنائية منذ السبعينات دون الإشارة لاسمه … اصدر ديوان ” اللي ف لقلب ع اللسان ” بساعدة أصدقائه وجمعية الإشعاع للثقافة والتنمية الصويرة