بغيت نسولك وبغيت جواب
بغيت نسولك
وما تاخدهاش مني قلت الصواب
طالب منك جواب ما قابل عتاب
بغيت نسولك على السكن
واش حنا ساكنين
ولا غير مخبين
والأراضي
شكون خذا أرض بلادي
كاين السكن الاقتصادي
====
أسيدي ؟؟ أجي فين غادي
بغيت نسولك عل الصحة
وجاوبني بصراحة
فين هو حق فالتغطية
ولا حيد عليا
و حق التطبيب
كيفاش الله يجيب
واسبيطارات
حتى يساليو الحفلات
والأطبا والممرضين
على ما فراسكش كاينين
و حقنا فالدوا
لا لا ماشي أنا لي دوا
====
أ سيدي؟؟ أجي فين غادي
بغيت منك جواب
وما تاخدهاش مني قلت صواب
نسولك عل الخدمة
وجاوبني بلا حشمة
واش كاين شي خدمة
ولا هاذي غير حلمة
كلشي خدام فالبطالة
ولي بقا فالعمالة
غادين تخدمو المعطلين
قولو: لينا غير إمتى وفين
والموجازين
غادي ترد عليا نهار الاثنين
وصحاب الشواهد
ما كينش سي حميد
و الأساتذة
كيفاش سير حتى الغدا
====
أ سيدي؟؟ أجي فين غادي
بغيت منك جواب
وما تاخدهاش مني قلت صواب
نسولك عالصحافة .. والإعلام
واخا غير هضرة .. وكلام
فين التلفزة .. والإذاعة
هاديك غير إشاعة
وااا ما فراسييش
آآآآه ما واعيش
====
أ سيدي؟؟ أجي فين غادي
بغيت منك جواب
وما تاخدهاش مني قلت صواب
بغيت نسولك عل التعليم .. والتربية
والأطر العليا
ونتا غير سمع ليا
البحث العلمي وماليه
ما عندك ما دير بيه
والعمال .. والفلاحين
كلشي كايقول : العام زين
والقرى والبوادي
ما محسوبينش ولادي
والصيد البحري
ودوك الخيرات
داهم الغرب
والجنرالات
والفوسفاط
والمعادن
سكت يا مسخوط الوالدين
والأثمنة والأسعار
واش هادشي ماشي عار
والمعتقلات السرية
داخلا فالتنمية البشرية
بغيت نسولك عالحرية
لا صافي غير سمح ليا
====
أ سيدي؟؟ أجي فين غادي
بغيت منك جواب
وما تاخدهاش مني قلت صواب
بغيت نسولك عل الدستور
لااا دستور الشعب
عاوتاني سير تلعب
راه كيتعدل
من الخيمة خرج مايل
ودوك الفصول؟ نتا أش كاتقول
أجي بعدا شكون نتا
وقيلا كنت بحالك نتا
وشكون أنا
ماشي أنا
وسمح ليا
واش معايا .. ولا عليا
أنا بعدا معا الحرية
أسيدي بعد مني
نمشي مع سيدي لي يدقني
إيو احظي راسك
لا تفوتك القافلة وما تلحقني
======
الشاعر : أبوالغضب
نصرالدين خيامي بلمهدي
مراكش 2012