حنظلة ..
عن الشهيد ناجي العلي فنان الكاريكاتور المقاوم
—————————————————————-
حل الباب للريح تدوز ..
وكدي نيران كانونك
وغني للشمس العريانة
ف ويدان الخوف
وتحت شجار اللوز ..
الغريب يتوضا بالدم
ويصلي للموت ..
غلا ف برادو اتاي زحل
و ف ضو الكمرة رحل ..
وشرب ف كيسانو ضيم بيروت ..
يلبس جلد الموت ..
ويتسنى القوت ..
ويكول للخوف خاف
ويكول للجوع جوع ..
انا عربي
وكل مافي حي ممنوع ..
…
…
دق عليك بعكاز مسوس
والرصاص خيط من السما
يسقي ترابك
وورود ف جنانك سخفانة ..
علات ايديها للكمرة
والكلاب تنبح ..
والشيخات تشطح ..
والليلة حمرا
والشراب سال ف الطرقان
غزة وأريحا علامات
جابوا النكافة ولعريفة ولمقدم
والزغاريد ف نصايص الليل ملعلع ..
والريس الجديد يتفوه يكمع ..
خايف يخطب
يكواو منحوس سكع ..
ياويلي
سربيس الذل طويل
يعرج ف بلادي بالخيانة
وبمحراثو لمصدي
ف زريعة مريكان يزرع ..
وانت تشوف اطرش وابكم ..
ماباغي تسمع ماباغي تتكلم ..
قدامك طفل صغير
راسو شمس
وعينيه فلسطين ..
مدربل ويخنزر
حفيان وعريان
شاف اللي ماشافتو عين ..
وانت تشوف وتشوف معاه اكثر ..
تكوي كلامك ف لسانك وتصبر ..
هذ البر قدامك ادرك * وسدر
وحناش وقرودة تضحك عليك
وانت غشيم فيها تتفرج
والذياب م وراك تتاوى
لحمك رخيص
ولاتراب تقبل قبرك ..
ولا قبر يقبل صبرك ..
لو كان لازم تفهم ..
كان منو تتعلم ..
راسو شمس وعينيه فلسطين ..
طفل صغير
عايق وقافز ..
ف اداعات وجورنالات لعراب
و ف وجه لعدو طانز
طفل صغير
ويعرف مايدير ..
تبايع ليه الريح
وامواج لبحر
وجبال الدنيا وويدانها
اللي يبغي بلادو
يبنيها ب لحديد ولحجر
ضربة بالمقلاع ف عين لعدو ..
يديه خناجر
لعنق الخيانة تمدو ..
…
…
راسو شمس وعينيه فلسطين ..
حل الباب ليه يدوز
وكدي نيران كانونك
وغني للشمس العريانة ..
كمرتنا بايتة سهرانة ..
تحاجي لينا للي جاي
بورود وشتا ورعود ..
بتابو وعلامو يعود ..
حالفين ماننساوه
حالف ماينسانا
حالف ماينسانا
حالف ماينسانا ..
* زجل : محمد نور الدين بن خديجة
– كتبت سنة 1992 في ذكرى اغتيال ناجي العلي رسام الكاريكاتور الفلسطيني .