( ص )
بزاف عليكم المغرب
إلا غير حافظين سميتو
وما حاسّين بوجع الناس
اللّي ساكن فزنقتو
بزاف عليكم المغرب
إلا غير كتهضرو عليه
وخليتو ولادو واقفين
قدّام الباب… ما داخلين ليه
المغرب ماشي غير هدرة
ولا راية فوق السطاح
المغرب دمعة فالعين
وخبزة سخونة مع الصباح
المغرب صوت الغيوان
طالع من قلب الدروب
حكاية صبر فالحومة
بين الضحك… وبين لكروب
بزاف عليكم المغرب
إلا بعتو نهارو برخيص
وخليتو الليل يطوال
فعينين الصابر المسكين
المغرب راه ديال الناس
ديال اللّي عاشو فيه بوجع
ديال اللّي قالو الصبر زين
وخلاّو القلب يتوجّع
بزاف عليكم المغرب
إلا ما حسيّتوش بنبضو
راه فالقلب ديال الشعب
ساكن… وكيغنّي بنبضو
المغرب ماشي حروف
المغرب ضحكة ودمعة
اللّي ما عاش حكايتو
يضوّي طريقو بشمعة
واللّي بغا يفهم حكايتو
يمشي يقرا فعيون الناس
المغرب ماشي غير بلاد
المغرب… جرح وحساس
( ع )
بزاف عليكم المغرب
يا دلقشية فسوق العيب
كتبيعو الشمس فالغيم
وتشريو الظل من الغيب
بزاف عليكم هاد لبلاد
يا سماسرة ديال الخراب
كتفرشو الكذوب ورد
وتغطّيو الجرح بثوب السراب
كتحلفو بالوطن العالي
وتديرو القلب فجيب
إلى جا الحق كتغيبوا
وإلى جا النهب كتقولو: نصيب
يا اللي بعتو الضمير
فميزان الكذوب الرخيص
الدنيا سوق يدور
والغشّاش يطيح مفلس وتعيس
المغرب ماشي سلعة
تتباع فحانوت العار
المغرب روح فصدورنا
ونار فدم الأحرار
اللي خان التراب نهار
غادي يفضحو نهار
حيت الأرض كتكتب الأسامي
بالحجر… ماشي بالغبار.
الشاعر المغربي
نصرالدين خيامي بلمهدي